ضمیر کابلوف، نماینده خاص رئیس‌جمهور روسیه در امور افغانستان می گوید که خطر آن وجود دارد که چرخبال‌های ارتش پیشین افغانستان که هنگام سقوط این کشور بدست طالبان به تاجیکستان و ازبیکستان انتقال داده شده بودند، به اوکراین برسند.

خبرگزاری اسپوتنیک گزارش داده است، او گفته است که روسیه نمی‌خواهد این تجهیزات بدست اوکراین بیفتد.

کابلوف گفته است که حدود ۶۰ چرخبال و هواپیما به تاجیکستان و حدود ۴۰ الی ۵۰ چرخبال و هواپیما به ازبیکستان منتقل شده‌اند.

طالبان بارها تأکید کرده‌اند که این هواپیماها باید به افغانستان بازگردانده شوند. این گروه به کشورهای تاجیکستان و ازبیکستان نیز در این مورد هشدار داده بود.

مقام‌های ازبیکستانی اما چندی پیش گفته بودند که ده‌ها هواپیمای ارتش حکومت پیشین را به حکومت طالبان تحویل نمی‌دهند.

مقام‌های دفاعی امریکا نیز گفته بودند که ازبیکستان و تاجیکستان هیچ برنامه‌ای برای تحویل هواپیماهای حکومت پیشین افغانستان به طالبان ندارند.