مقامات شورای عالی صلح کشور می‌گویند، یک هیأت بلند رتبه طالبان برای گفت‌وگو و مشوره با رهبران این گروه به پاکستان رفته است.

روزنامه آن لاین سیاه وسفید:

اسدالله زایری، سخنگوی شورای عالی صلح  می‌گوید، سفر هیأت طالبان به پاکستان یک گام مثبت است و آنان از این سفر استقبال می‌کنند.

به گفتۀ او، اگر هیأت طالبان با رهبران‌شان بر سر آتش‌بس و آغاز گفت‌وگوهای بین‌الافغانی با حکومت توافق کند، گام مثبت در تأمین صلح در کشور است.

سیداکبر آغا، عضو پیشین طالبان نیز این موضوع را تأیید می‌کند و می‌گوید که هیأت طالبان به رهبری ملا شهاب‌الدین دلاور چند روز پیش به پاکستان رفته است.

به گفتۀ او، ممکن است نماینده‌گان طالبان در گفت‌وگو با نماینده‌گان آمریکا روی آتش‌بس و آغاز گفت‌وگوهای صلح با حکومت افغانستان توافق کنند.

دفتر سیاسی طالبان در قطر تاکنون در باره به رسانه‌ها چیزی نگفته است.